நீயெல்லாம் நண்பனாடா?

'நீயெல்லாம் நண்பனாடா?'

இப்படிக்கேட்டுவிட்டுத்தான் ஆரம்பித்தான் சங்கர்.

'நீதான் எதைப்பாத்தாலும் அப்படியே வரையிவியேன்னு உங்கிட்ட வந்து எங்க அப்பா கையெழுத்தை மார்க் ஷீட்டில் போடச்சொன்னா உடனே தர்மம் நியாயம் எல்லாம் பேசுறியே! உனக்கெல்லாம் நட்பைப்பத்தி என்னடா தெரியும்?'

அவனோடு பிரபுவும்,சிவாவும் சேர்ந்துகொள்ள..அவன் அப்பா கையெழுத்தை அப்படியே போட்டேன்.

' நண்பன்னா நீதாண்டா நண்பன்! 'என்றான் சங்கர் முகம் முழுக்க பற்களோடு!

படித்து முடித்து ,ஒரு நிறுவனத்தில் வேலைபார்த்துக்கொண்டு இருந்தபோது சிவாவும் என்னுடனேயே தங்கியிருக்க, ஒரு நாள் இரவு சினிமாவுக்குப்போனபோது, டிக்கெட் கவுண்ட்டருக்குள்ளிருந்து அந்தக்குரல் கேட்டது,

'நீயெல்லாம் நண்பனாடா? - இந்த ஊர்லதான் இருக்கேன்னு ஒருவார்த்தை சொல்லக்கூடாது.? '

'அட..சங்கரு எப்படிடா இருக்க?' என்று அளவளாவ, இங்கதான் தியேட்டரில் டிக்கெட் குடுக்குறேன். நீ எங்க இருக்க? என்று விலாசம் வாங்கிக்கொண்டான்.

சில மாதங்களில்...ஒரு நாள் இரவு 10 மணிக்கு மேல் அறைக்கதவு தட்டப்பட, திறந்தால்..சங்கர்!

என்னடா?

'நண்பா..தியேட்டருக்கு அடிக்கடி வரும் ஒரு பொண்ணை லவ் பண்றேன். அவுங்க வீட்டுல தெரிஞ்சுபோச்சு..அதுனால கூட்டிக்கிட்டு ஓடப்போறேன்.பஸ் ஸ்டாண்டில் அவளை உக்கார வச்சிட்டு வந்திருக்கேன். ஆயிரம் ரூபா குடுடா!'

'டேய்..இன்னும் நீ வாழ்க்கைல செட்டிலே ஆகலை! வயசு வேற 23தான் ஆவுது! இப்ப ஏண்டா லவ்வு கிவ்வுன்னு.. அப்படியே திரும்பி வீட்டுக்குப்போயிரு..! நானும் சிவாவும் போய் அந்தப்பொண்ணை அவ வீட்டில் விட்டுர்றோம்.!' என்று சொல்லி முடிப்பதற்குள்,

'நீயெல்லாம் நண்பனாடா? இவ்வளவு நாள் பழகியும் ஆயிரம் ரூபா தர்றதுக்கு என்னல்லாம் அட்வைஸ் பண்ணுற! உனக்கு நட்புன்னா என்னன்னு தெரியுமாடா ' என்று கத்திப்பேசி அழ ஆரம்பிக்க..அக்கம்பக்க அறைகள் கவனிக்க ஆரம்பித்தன.

சிவாவும், 'சரி விடுடா! அவன் இப்ப அட்வைஸ் பண்ற நிலமைல இல்லை! காசைக்குடுத்து விட்ருவோம்.! போய் பொழச்சுக்கட்டும்' என்று என்னை அடக்கி காசைக்கொடுத்து அனுப்பிவிட்டான்.

ஆண்டுகள் ஓடின..

கோவையில் உள்ள சித்தப்பா பெண் திருமணத்துக்கு, உறவினர்களுடன் பாத்திரங்கள் வாங்கிவிட்டோம். பெயர் வெட்டலாமென்று கடைவாசலுக்கு வந்தால்...பெயர் வெட்டிக்கொண்டிருந்தது..சங்கர்!

'டேய் சங்கரு! எப்படிடா இருக்க?'

திரும்பியவன், என் முகத்தைப்பார்த்ததும்...

டேய் ! நீயெல்லாம் நண்பனாடா! நட்புன்னா உனக்கு என்னான்னு தெரியுமா? அன்னிக்கு பணம் கேட்டு வந்தேனே? ஒரு கன்னத்துல ஒரு அறைவிட்டு ரூமுல தள்ளி கதவைச்சாத்தியிருந்தீன்னா...நான் இப்ப இந்தக் கதிக்கு ஆளாயிருப்பேனா..! கல்யாணம் பண்ணி..ரெண்டு புள்ளையும் பெத்து தடுமாறிக்கிட்டிருக்கேண்டா..எல்லாத்துக்கும் நீதாண்டா காரணம்..! என்று கத்திக்கொண்டே போனான்.!

விமானப் பயணத்தில் சினிமா வியாபாரம்

அடுத்தடுத்து சாதனைகள் படைத்துக்கொண்டிருக்கும் ஒரு விளையாட்டுவீரனை அவனும், அவன் நண்பர்களும், ரசிகர்களும், தேசமும் புகழ்ந்துகொண்டிருந்தாலும், அந்த வெற்றி நிலைக்கு வருவதற்காக அடைந்த அவமானங்கள், தலைகுனிவுகள், சிரமங்கள் ஆகியவற்றை அவனால் மறக்கவே முடியாது. அதிலேயே ஊறிப்போன அவன், நல்ல விளையாட்டுவீரனாவது எப்படி என்று ஒரு சிறப்பான பயிற்சியை அளிக்கமுடியும்.

சினிமா என்பது மற்றவர்களுக்கு பிரம்மாண்டமாய், சுலப வருமானமாய்த் தெரிந்தாலும், உள்ளிருப்பவர்களுக்குத்தான் அதன் சோகங்களும், சூட்சுமங்களும் தெரியும். அந்தவகையில், பல ஆண்டுகளாய் திரைத்துறையிலேயே வாழ்ந்து,
வென்று ,தோற்று , மீண்டும் வென்று அதனையே சுவாசித்துக்கொண்டிருக்கும் திரு.சங்கர் நாராயண் (பதிவர் கேபிள் சங்கர்) அவர்கள் எழுதி கிழக்கு பதிப்பகம் வெளியிட்டிருக்கும் சினிமா வியாபாரம் படிக்க ஆரம்பித்தது ஒரு விமான நிலைய காத்திருப்பில்..! பின் எப்போது விமானத்தில் ஏறினேன்? அங்கு என்ன உண்ணக்கொடுத்தார்கள்? எப்போது அடுத்த நகரில் வந்திறங்கியது என்று தெளிவாக நினைவில்லாத வகையில் , சினிமா வியாபாரச் சுழலுக்குள் நான்
சிக்கிக்கொண்டேன்.

புத்தகம் சுலப நடையில் ஆரம்பித்து , அதே நடையில் ஆக்கிரமித்து, கடைசியில் கைகுலுக்கும் முன்னரே கைகாட்டிச்சென்றுவிடுகிறது.

தமிழ் சினிமாவின் சினிமா வியாபார யுக்திகள், தியேட்டருக்கு ஒரு படப்பெட்டி வரும் வரை ஏற்படும் சிரமங்கள், சாதாரண ஹீரோவுக்கும், சூப்பர் ஹீரோவுக்கும் கடைப்பிடிக்கப்படும் வித்யாசமான வியாபார முறைகள், தயாரிப்பாளர், விநியோகஸ்தர், தியேட்டர் அதிபர் ஆகியோருக்கிடையில் இருக்கும் பிணக்குகளும், பிணைப்புகளும் என்று பல்வேறு தளங்களில் புகுந்து விளையாடியிருக்கிறார்.

விநியோகஸ்தர்கள் படும் சிரமங்களும், பட விநியோகத்தில் கிடைக்கும் திடீர் லாபங்கள் என எடுத்துக்காட்டுகளுடன் விளக்கியிருப்பது சிறப்பு! மேலும் இவரே பட்ட அனுபவங்களையும், பக்கா அனுபவங்களையும் சுவாரஸ்யமாக தேவையான இடங்களில் தூவியிருக்கிறார். அதிலும் அந்த ' உயிரிலே கலந்தது' ரிலீஸ் அன்று இவர்கள் செய்த செயலைப்பார்த்து மற்றவர்கள் ஏன் சிரித்தார்கள் என்று சொல்லும்போது இடம், நேரம் மறந்து நானும் குபீரென்று சிரித்துவிட்டேன்.

தமிழ் சினிமா என்றில்லாமல், ஹிந்தித் திரையுலக வியாபாரம் எப்படி இயங்குகிறது? ஹாலிவுட் படங்களின் வியாபாரம் எப்படி நடக்கிறது என்பதையும் இவர் கற்றுக்கொண்டு எளிய தமிழில் விளக்கியிருக்கிறார். தமிழகத்தில் ஹாலிவுட் படங்களை நீண்டகாலமாக விநியோகித்துவரும் ஒரு பெரிய மனிதரிடம் இந்தப்புத்தகத்தைப்பற்றி பேசும் வாய்ப்பு கிடைத்தது. அவர் ஒரு பயணத்தில் இருந்ததால், அட்டையை மட்டும் பார்த்துவிட்டு,

"மேட்டர் நல்லா இருக்கே? நம்ம ஆபீஸில் ஒண்ணு வாங்கிக்குடுத்துருங்க! " என்றார்! மேலும், ஹாலிவுட் படங்கள் குறைவான முதலீட்டில் நிறைவான லாபம் தரக்கூடியவை என்றும், அந்தப்பொன் முட்டையிடும் வாத்தைப்பற்றி யாருக்கும் தெரிவதில்லை எனவும், அவரது இன்னொரு தமிழ்ப்பட தயாரிப்பு நிறுவன முதலீடே, ஹாலிவுட் படங்கள் தரும் வருமானம்தான் என்ற இரகசியத்தையும் உடைத்தார்.

கிழக்கு பதிப்பகம் ஏன் வெற்றிகரமாக இயங்குகிறது என்பதற்கு, எழுத்தாளர்களையும், துறைகளையும் தேடித்தேடி அவர்கள் பதிப்பிக்கும் இதுபோன்ற புத்தகங்களே சாட்சி! விரைவில் இந்தப்புத்தகம் திரைப்படத் தயாரிப்பாளர்களாலும், விநியோகஸ்தர்களாலும், தியேட்டர் அதிபர்களாலும் வரவேற்புப் பெற்று பாராட்டப்படும் வாய்ப்பு உண்டு! படைப்பாளிகளும் படித்துவைத்துக்கொண்டால், அதற்கேற்றாற்போல் பட்ஜெட் போடவும் முடியும்!

சினிமா வியாபாரம் பற்றி சிறப்பாக எழுதப்பட்டிருக்கும் இந்தப்புத்தகத்திலும் சிறு சிறு குறைகள் உண்டு - அதை இங்கு சொல்லி என்ன ஆகப்போகிறது.? புத்தக ஆசிரியர் என் நண்பர்தான், போனில் சொல்லிக்கொள்கிறேன்.